HITZALDIA

OTSAILAK 24 asteazkena 19:30etan hitzaldia euskaraz Armada Etorbideko Hitzaldien Aretoa (Iruñea) Ateneo Navarro-Nafar Ateneoaren laguntzarekin.

"Iñauteriak: tradizioaren dinamikotasuna eta forma berriak"

Iñauteriak Euskal Herrian ibilbide luzea duten ospakizunak ditugu. Mozorro festa ikusgarriak, musika, dantza eta antzezpen dotore eta jendetsuak zein puska biltze xumeagoak, iñauteriek herri komunitatearen izaera antzeztu eta indartzen dute. Urtez urte, data aldakorreko egutegiaren baitan festa eta elkarretaratzearen aitzakian, bestelako esanahiak ageri zaizkigu ere, gizartearen antolaketa, balio eta sinboloen berri izaten ahalbidetzen dutenak. Tartean, tradizioaren kontzeptua bera. Iñauteriek aukera paregabea eskaintzen dute tradizioaren dinamikotasuna aztertzeko, iraganaren eta etorkizunaren arteko irakurketa iradokitzaileak arakatzeko, gizarte bakoitzean dauden tentsio eta erronkei neurria hartzeko. Festaz haratago, bestelako esanahiak topa ditzakegu mozorroen azpian ere. Itxura zaharreko mozorro zein forma berrituapean datozkigun erritoen azpian, tradizioaren irakurketa zurrun batek sorrarazten dituen tentsio eta kontraesanak eta proposamen berritzaileekin egiten dugu topo. Hauek guztiak izango ditugu aztergai hitzaldian zehar, irudiz lagundurik.

Aitzpea Leizaola Egaña Antropologia eta hizkuntzalaritzan lizentziatua, Paris X Nanterre eta Sorbonako unibertsitateetan. Gradu-ondoko formakuntza atzerriko hainbat unibertsitate eta ikerketa zentrotan osatu du, hala nola Berlingo Freie Universitat, Belfasteko Queen’s University eta Renoko Basque Studies Center-en. 2000-01 irakasle gonbidatua izan zen Oxfordeko Unibertsitateko St Antony’s Collegen. Egun Euskal Herriko Unibertsitatean antropologia eskolak ematen ditu. Hainbat lan argitaratuak ditu euskaraz, frantsesez, ingelesez eta gazteleraz.